सिरहाको सलहेस युवा क्लब ताप्लेजुङ गोल्डकप फुटबल प्रतियोगिताको सेमिफाइनलमा प्रवेश गरेको छ ।

सदरमुकाम फुङलिङस्थित भानुजन माविको मैदानमा आज भएको खेलमा पॉचथर फुटबल क्लबलाई १–० गोलले पराजित गर्दै सलहेस सेमिफाइनलमा पुगेको हो ।

उसको जितमा ४१ औं मिनेटमा जय गुरुङले गरेको गोल निर्णायक बन्यो ।

यसअघि हिजो भएको खेलमा पाहुना टोली भारतको कञ्चनजंघा युवा क्लबलाई ७–५ गोलको फराकिलो अन्तरले पराजित गर्दै आयोजक संघर्ष स्पोर्टिङ क्लब सेमिफाइनल प्रवेश गरिसकेको छ ।

प्रतियोगिता अन्तर्गत भोली हुने खेलमा रुपन्देहीको बुटवल लुम्बिनी फुटबल क्लब र मोरङको सगरमाथा युथ क्लबबीच प्रतिस्पर्धा हुनेछ ।