केलियन एमबाप्पेको ह्याट्रिक गोलमा रियल म्याड्रिडले स्पेनिस ला लिगा फुटबलमा शानदार जित निकालेको छ । गएराति भएको खेलमा रियल म्याड्रिडले रियल भालाडोलिडलाई उसैको मैदानमा ३–० गोलले हराएको हो । 

खेलको ३० औं मिनेटमा एमबाप्पेको गोलबाट म्याड्रिडले अग्रता लिएको थियो । जुड बेलिङ्घमको पासलाई फ्रान्सका कप्तान एमबाप्पेले गोलमा परिणत गरेका थिए । दोस्रो हाफमा एमबाप्पेले व्यक्तिगत दुई गोल फर्काए । 

खेलको ५७ औं मिनेटमा एमबाप्पेले रोड्रिगोको पासमा गोल गर्दै रियलको अग्रता दोब्बर पारे । खेलको अतिरिक्त समयको पहिलो मिनेटमा अर्को गोल थप्दै एमबाप्पेले ह्याट्रिक पूरा गरे । 

रियलका लागि यो उनको पहिलो ह्याट्रिक हो । यो जितसँगै म्याड्रिडले ला लिगाको शीर्ष स्थानमा चार अंकको अग्रता बनाएको छ । शीर्ष स्थानको म्याड्रिडको २१ खेलबाट ४९ अंक भएको छ । रियल भालाडोलिड भने ला लिगाको पुछारमा नै रहेको थियो ।

ला लिगाको अर्को खेलमा एट्लेटिको म्याड्रिडले भिल्ला रियलसँग १–१ गोलको बराबरी खेलेको थियो । दोस्रो स्थानको एट्लेटिको समान २१ खेलबाट ४५ अंक भएको छ । भिल्ला रियल भने ३४ अंकका साथ तालिकाको पाँचौं स्थानमा रह्यो । यस्तै, रियल बेटिसले मालोर्कालाई १–० गोलले हराएको छ ।