पेट्रोलको मुल्य एक रुपैयाँले घट्यो
जेष्ठ २२, २०७६ | काठमाडौं
- आयल निगमले पेट्रोलमा प्रतिलिटर एक रुपैयाँ घटाएको छ । अन्तराष्ट्रिय बजारमा मूल्य घटेपछि निगमले आजराती १२ बजेदेखि लागू हुनेगरी पेट्रोलको मूल्य घटाएको हो ।
डिजेल, मट्टितेल, हवाई इन्धन र खाना पकाउने एलपी ग्यासको मूल्य भने निगमले यथावत् राखेको छ । भारतीय आयल निगम आईओसीले पठाएको नयाँ मूल्यसूची अनुसार पेट्रोलमा प्रतिलिटर १ रुपैयाँ घटाईएको निगमका उपनिर्देशक विनितमणि उपाध्यायले जानकारी दिनुभयो ।
पेट्रोलको मूल्य अवदेखि प्रतिलिटर १ सय १० रुपैयाँ कायम भएको छ । आयल निगम नोक्सानमा गएपछि २०७१ असोजबाट स्वचालित मुल्य प्रणाली लागू गरिएको हो ।
अर्थमन्त्री युवराज खतिवडाले आगामी बजेटमा सडक बनाउने नाममा पेट्रोल र डिजेलमा प्रतिलिटर १ रुपैयाँ थप शुल्क लिने निर्णय गर्नुभएको थियो । लगत्तै निगमले मूल्य समायोजन गरेर पेट्रोल, डिजेल र मट्टितेलमा १ रुपैयाँ ५० पैसाका दरले मुल्य वढाएको थियो ।
आईओसीले १ र १५ तारिखमा नयाँ मूल्यसूची पठाउने गरेको छ ।