सरकारले ७ वटा औद्योगिक प्रतिष्ठानको लगानी व्यवस्थापन गर्न स्वीकृति दिएको छ । 

मन्त्रिपरिषदको पछिल्लो बैठकले जनकपुर चुरोट कारखाना, गोरखकाली रबर उद्योग, उदयपुर सिमेन्ट उद्योग, हेटौँडा सिमेन्ट उद्योग, नेपाल मेटल कम्पनी, बुटवल धागो कारखाना र नेपाल ओरियण्ड म्याग्नेसाइट गरी ७ वटा प्रतिष्ठानको सरकारी लगानी व्यवस्थापन गर्न स्वीकृति दिने निर्णय गरेको हो ।

त्यस्तै, कैलालीको पूर्वी क्षेत्रमा रहेको रानी जमरा कुलरिया सिँचाइ आयोजनाको नहर निर्माण तथा विस्तार गर्न सरकारले करिब २ सय ८९ हेक्टर क्षेत्रफल जग्गा प्राप्ति गर्न ऊर्जा जलस्रोत तथा सिँचाइ मन्त्रालयलाई स्वीकृति प्रदान गर्ने निर्णय गरेको सञ्चारमन्त्री पृथ्वीसुब्बा गुरुङले जानकारी दिनुभयो ।