कोशी प्रदेश पूर्ण खोप सुनिश्चित घोषणा
![](http://radio-assets-api.ekantipur.com/thumb.php?src=http://radio-assets-cdn.ekantipur.com/uploads/source/news/2024/third-party/khop-1720964944.jpg&w=700&height=600)
असार ३०, २०८१
कोशी प्रदेशमा रहेका १६ देखि ५९ महिनाभित्रका बालबालिकाले १५ महिनाभित्र लगाउनुपर्ने सबै खोप पाएको सुनिश्चित भएपछि आज कोशी प्रदेशलाई पूर्ण खोप सुनिश्चित घोषणा गरिएको छ । स्वास्थ्य मन्त्रालयको पूर्ण खोप सुनिश्चित कार्यक्रम अन्तर्गत ७७ जिल्लामध्ये ७६ जिल्ला र सात प्रदेशमा ६ प्रदेश पूर्ण खोप सुनिश्चित घोषणा भएको छ । अब प्रदेशमा बागमति र जिल्लामा नुवाकोट मात्र पूर्ण खोप सुनिश्चित क्षेत्र हुन बाँकी रहेको बाल स्वास्थ्य तथा खोप शाखाका प्रमुख डा. अभियान गौतमले बताउनुभयो ।
बालबालिकालाई १३ खोपको १८ मात्रामा दिनुपर्ने भएकाले प्रत्येक वर्ष खोप सुनिश्चित अभियान सञ्चालन गर्ने गरिएको उहाँको भनाइ छ । भौगोलिक कठिनाइका कारण कतिपय हिमाली क्षेत्रमा हिँडेर खोप दिन जानुपर्ने बाध्यता रहेपनि विगतको तुलनामा अभियान कार्यान्वयन गर्न केही सहज भएको डा गौतमले बताउनुभयो । पूर्ण खोप सुनिश्चितता निर्देशिका २०७७ को पूर्ण कार्यान्वयनको लागि गत माघबाट पाल्पा जिल्लामा खोप लगाउन सुरु गरिएको अभियान जारी छ । अभियान अन्तर्गत पाल्पा पूर्ण खोप सुनिश्चित जिल्ला घोषणा भएको थियो भने प्रदेशमा गण्डकी पूर्ण खोप सुनिश्चित क्षेत्र घोषणा भएको थियो । अब नुवाकोट जिल्ला पूर्ण खोप सुनिश्चित घोषणा भइसकेपछि बागमति प्रदेशलाई पूर्ण खोप सुनिश्चित क्षेत्र घोषणा गरिनेछ ।